Concello de Ribadavia celebrou unha nova reunión da Mesa Local de Comercio. Nela participaron o director xeral de Comercio da Xunta de Galicia, Gabriel Alén; a segunda tenente alcalde de Ribadavia, Concelleira de Obras, Urbanismo, Medio Ambiente e Vitivinicultura, e presidenta da Mesa Local de Comercio, Mari Luz Expósito; a representante da Asociación de Consumidores e Usuarios do Ribeiro–ACUR, Julia Gómez; o presidente de establecementos asociados do Ribeiro-EAR, Raúl Mato; a técnica do EAR, Isabel Rodríguez; o técnico do Concello de Ribadavia, José Iván Martínez; e a responsable da Oficina Municipal de Información ao Consumidor-OMIC, Erundina Pumares.
O alcalde ribadaviense, César Fernández, aproveitou a ocasión para explicar en detalle o plan de dinamización do comercio no casco histórico de Ribadavia. Este plan contempla melloras nas infraestruturas comerciais e a promoción da dixitalización do comercio tradicional, co obxectivo de fortalecer o tecido comercial e atraer tanto a veciños como a visitantes. Recentemente, o rexedor abordou este plan co conselleiro de Emprego, Comercio e Emigración, José González.
Durante a reunión da Mesa Local de Comercio aprobouse o programa de actividades dos Espazos de Activación Comercial (EAR) para o ano 2025. Este inclúe diversas accións de promoción e dinamización propostas pola asociación de comerciantes para impulsar o comercio local ao longo do ano.
Unha destas accións é “Benvida Primavera”, que se realizará en marzo en colaboración co Concello. Consistirá en agasallar plantas e sacas ás persoas que presenten un tícket de compra dun comercio local con determinado importe mínimo. Tamén se continuarán coas colaboracións habituais, como a “Mostra Internacional de Teatro”, e, máis adiante, os “Bonos Comercio”. Así mesmo, cando se aproxime a vendima, os comercios da capital do Ribeiro porán en marcha a súa campaña de promocións e agasallos vitivinícolas.
Ademais, a reunión serviu para trasladar aos comerciantes e representantes de consumidores as liñas estratéxicas do programa de dinamización do comercio que o Concello de Ribadavia porá en marcha neste ano en colaboración coa Xunta de Galicia.
PLAN REXURBE EN RIBADAVIA
Por outra banda, a Xunta de Galicia anunciou que o Plan Rexurbe de rehabilitación de vivendas recibiu cinco ofertas para a rehabilitación dun edificio situado na rúa García Boente, no casco vello de Ribadavia. Esta actuación permitirá a creación de cinco novas vivendas, cun investimento de 1,7 millóns de euros. Así, contribuirase á recuperación patrimonial e á revitalización da zona histórica do municipio.
O Concello de Ribadavia reafirma o seu compromiso co comercio local e co desenvolvemento urbano sostible, colaborando coa Xunta de Galicia en proxectos que melloren a economía local e a calidade de vida dos seus cidadáns.
