A maior parte da veciñanza de San Sadurniño ten xa na casa o recibo do lixo, calculado cos prezos fixados na ordenanza aprobada hai un ano. As tarifas sitúanse en 90 euros anuais nas vivendas unifamiliares cunha recollida semanal e en 130 euros nas que o camión pasa dúas veces. Porén, debido a un erro na emisión dos recibos, non se aplicou a bonificación do 10% aprobada pola administración local, polo que se devolverán 9 e 13 euros segundo o caso. Dende o Concello de San Sadurniño salientan que será necesario facilitar un número de conta para o ingreso.
As persoas que teñan o recibo domiciliado non terán que facer nada, xa que a devolución se fará efectiva directamente na conta bancaria asociada á domiciliación. Pola contra, as que paguen o recibo acudindo ao banco ou por transferencia electrónica deberán aboar o importe completo que aparece na carta de pagamento (90 ou 130 euros). A continuación, deberán solicitar a devolución da diferenza. Esta fórmula permite axilizar o proceso e evitar o retraso e os custes que suporía anular e volver emitir todos os recibos.
SAN SADURNIÑO OFRECE DÚAS OPCIÓNS PARA A DEVOLUCIÓN
O Concello de San Sadurniño ofrece dúas opcións para solicitar a devolución. A primeira, presentar na Sede Electrónica ou no Rexistro municipal unha solicitude xenérica, indicando o número do recibo xa pagado e achegando un certificado de titularidade da conta bancaria.
No tocante á segunda opción, acudir en persoa ao Rexistro municipal en horario de mañá co recibo pagado e un documento onde consten os datos da conta da persoa titular do servizo. Pode ser a libreta do banco, un certificado ou outro recibo. Deste xeito, o Concello poderá facer o ingreso directamente despois das comprobacións oportunas.
O Goberno local incide na importancia de pagar o recibo polo importe completo -90 ou 130 euros-, xa que só así se poderá tramitar a devolución correspondente de 9 ou 13 euros. Non se debe acudir ao Concello sen ter realizado antes o pagamento, xa que se non se poderá practicar a devolución.
As solicitudes deben presentarse preferiblemente dentro do período voluntario de pagamento, que remata a finais deste mes. Non obstante, o Concello asegura se podería pedir a devolución ata mediados de decembro. Cómpre ter en conta que os recibos que pasen ao período executivo xa se emitirán cos importes correctos, pero levarán o recargo que lles corresponde polo atraso.
Desde o Concello de San Saduriño pregan desculpas polos inconvenientes ocasionados polo erro, producido durante a carga dos padróns que xestiona a Deputación da Coruña como entidade encargada da recadación do lixo e doutros impostos municipais. Para calquera aclaración sobre como proceder coa devolución, pódese chamarse ao 981 490 027 ou achegarse ás oficinas municipais en horario de mañá.
