O líder do PP de Santiago, Borja Verea, defendeu a necesidade de reforzar a proxección internacional da cidade e de aproveitar mellor as oportunidades que ofrece a relación histórica, cultural e lingüística entre Galicia e Portugal para atraer talento, investimento e actividade económica.
Durante unha conversa mantida en Bruxelas coa eurodeputada portuguesa Ana Miguel Pedro, integramente desenvolvida en portugués, Verea destacou o potencial de cooperación existente entre Galicia e o norte de Portugal en ámbitos estratéxicos como a innovación, a universidade, a biotecnoloxía ou a captación de talento.
“Santiago é unha cidade aberta ao mundo e debe aproveitar moito mellor a súa posición internacional e a súa conexión natural con Portugal para xerar novas oportunidades”, afirmou.
Neste sentido, considerou que Galicia e o norte de Portugal conforman hoxe un dos espazos de colaboración máis dinámicos da fachada atlántica europea e defendeu que Santiago debe aspirar a desempeñar un papel máis relevante nesa realidade compartida.
Verea puxo en valor a posición singular da capital galega como cidade universitaria, de coñecemento e de referencia internacional, e sinalou que a súa proxección exterior debe apoiarse tamén nas relacións estratéxicas co territorio portugués.
O líder popular destacou ademais a importancia crecente do mundo lusófono, integrado por máis de 300 millóns de persoas repartidas entre Europa, América, África e Asia, e asegurou que Galicia conta cunha vantaxe diferencial para fortalecer os seus vínculos con ese espazo.
“Entre Galicia e Portugal hai moito máis ca unha fronteira. Hai unha relación histórica, cultural e humana que debemos converter tamén nunha oportunidade de futuro para Santiago”, sinalou.
Finalmente, defendeu que a cidade debe actuar con máis ambición no ámbito internacional e aproveitar mellor a súa posición para impulsar novas oportunidades económicas, culturais e académicas.
“Santiago ten que mirar ao futuro con confianza, reforzar a súa presenza internacional e aproveitar todas as oportunidades que ofrece o espazo atlántico e lusófono”, concluíu.
