Barbadás será a primeira parada na provincia da exposición fotográfica itinerante, que forma parte do proxecto Corriente Cultural de Abanca e Afundación, e que poderá visitarse ata o 23 de maio
A Casa da Cultura Manuel María do Concello de Barbadás acolle a exposición fotográfica Destino do monfortino Manuel Valcárcel, na que presenta imaxes das súas peregrinacións a catro países de catro continentes distintos. A mostra, de carácter itinerante, enmárcase no proxecto Corriente Cultural de Abanca e Afundación, e conta coa colaboración do Concello .
A exposición fai así a súa primeira parada na provincia ourensá, despois de ter percorrido diversas localidades galegas. O público poderá visitala, de balde, no segundo andar da Casa da Cultura Manuel María ata o vindeiro 23 de maio.
Destino está composta por máis dunha trintena de fotografías, nas que o autor reflexiona sobre a familia, a emigración, o envellecemento ou a sostenibilidade a través da súa viaxe interior e física. Tíbet, Senegal, México e Galicia son os catro espazos elixidos por Manuel Valcárcel para contar distintas historias unidas por un mesmo destino.
Na inauguración da exposición de onte, participaron Beatriz Fernández-Anguino, coordinadora institucional de Afundación; Mateo Alonso, coordinador institucional de Abanca; Miguel Madriñán, director da sucursal Abanca de A Valenzá; Xosé Carlos Valcárcel, alcalde de Barbadás; Ana Peleteiro, concelleira de Cultura e José Manuel Morgade, concelleiro de Turismo.
