Ames, Brión, Dodro e Padrón organizaron a saída polos lugares senlleiros da vida e obra de Rosalía
Un total de 110 persoas, de todas as idades, participaron o pasado sábado 14 de setembro na ruta rosaliana As pegadas de Rosalía, organizada polos Concellos de Ames, Brión, Dodro e Padrón, e na que os participantes percorreron lugares senlleiros da vida e obra da escritora e poetisa galega.
A ruta comezou no Pazo da Peregrina, en Bertamiráns, e rematou na igrexa de Santa María de Iría Flavia cun concerto de Manoele de Felisa, que interpretou varios poemas de Rosalía de Castro musicados por el mesmo.
Esta ruta, a través da cal se pon en valor a vida e obra de Rosalía, tivo unha participación de 110 persoas, que, durante o percorrido, visitaron os lugares pertencentes ao territorio destes concellos que marcaron a vida e a obra da autora galega máis universal da nosa cultura.
Durante a ruta contouse coa colaboración de Lucía Picallo, guía oficial de Turismo de Galicia; e coa interpretación de dúas actrices: Ana Otero e Chiruca Tarrío, que estiveron caracterizadas de Rosalía de Castro.
Trátase dun itinerario que segue o trazado orixinal proposto por Avelino Abuín de Tembra nos noventa, actualizado polo presidente da Fundación Rosalía, Anxo Angueira, no 2017, e presentado en Fitur en colaboración con esta entidade.
