Rey Varela anunciou a creación deste grupo da candidatura a Patrimonio Mundial da Unesco tras a reunión técnica do Concello coa Xunta, a Armada e a Deputación
A candidatura de Ferrol a Patrimonio Mundial vén de crear un grupo de coordinación entre as distantas administracións e entidades implicadas, segundo explicou o alcalde do Concello de Ferrol, José Manuel Rey Varela, tras a xuntanza técnica que contou coa presenza de representantes da Xunta, da Deputación da Coruña, e da Armada do Arsenal de Ferrol.
A reunión, que se desenvolveu o pasado 2 de decembro, serviu para analizar e avaliar o estado do expediente da candidatura Cidade de Ferrol: Porto da Ilustración a Patrimonio Mundial da Unesco, e na que participaron o conselleiro de Cultura, Lingua e Xuventude, José López Campos, o almirante xefe do Arsenal Militar, Gonzalo Villar, o vicepresidente da Deputación da Coruña, Xosé Regueira, e o experto internacional en patrimonio mundial, Alfredo Conti.
“Constituír este grupo é un novo e importante paso no requerimento que nos formulou Conti no marco da xestión que cremos que é un ámbito no que poderemos avanzar a través deste grupo”, asegurou o rexedor ferrolán quen avanzou ademais que “este equipo reunirase con carácter semestral” e agradeceu, “en nome da cidade”, a xenerosidade das partes implicadas para continuar no camiño cara a declaración da cidade de Ferrol como Patrimonio Mundial da Unesco.
Rey Varela lembrou que no ano 2007 Ferrol conseguiu entrar na lista indicativa e agarda e incidiu, en referencia a creación deste grupo de coordinación que favorecerá a consecución da declaración, en que “coma sempre digo que non hai reto grande se traballamos xuntos”.
“Hoxe estamos catros administracións públicas demostrando que traballamos para continuar e coller con máis forza para o camiño que nos queda. Un labor no que é magnífico contar con Conti como coordinador para acadar a declaración de Patrimonio Mundial para Ferrol”
Pola súa banda, o conselleiro López Campos puxo en valor o traballo feito nos últimos anos polas partes implicadas “avanzando a nivel de activación social e de recoñecemento da candidatura”, e reiterou tras a xuntanza o compromiso do Goberno galego para que a proposta, incluída na Lista indicativa nacional na que se recollen os bens susceptibles de ser presentados a Patrimonio da Humanidade, “avance correctamente de cara a ser valorada como candidata ao máximo recoñecemento da Unesco, o que leva consigo un intenso traballo como estamos a experimentar no caso da Ribeira Sacra”.
