O ciclo Fusa Guillén de Cederia tamén inclúe as representacións de Oquetiqueiras e Muñeiras do Vento, elixidas entre as 12 compañías que se presentaron á convocatoria
O ciclo Fusa Guillén de teatro afeccionado, organizado polo Concello de Cedeira, subirá o pano desta edición, o vindeiro domingo 17 de novembro (19:00 horas) no Auditorio Municipal, coa representación Unha luz na noite do grupo de teatro mugardés Teruca Bouza, e que foi unha das tres compañías elixidas para o ciclo entre as 12 que se presentaron á convocatoria do Fusa Guillén.
Unha luz na noite, que abre o ciclo Fusa Guillén, é unha comedia que leva ao espectador por unha viaxe de sentementos que o fai reflexionar sobre como afrontar a vida en parella. Xunto a esta representación do grupo de teatro Teruca Bouza, foron seleccionadas outras dúas compañías que completarán o ciclo os días 30 de novembro e 1 de decembro.
O último día do mes, será a quenda das ferrolás Oquetiqueiras do Grupo Bazán, coa súa obra Ora Pro Nobis no Auditorio ás 20:00 horas. Trátase dunha comedia que se desenvolve nun convento perdido nun monte con tres atípicas monxas, un estraño cura e unha noviza na procura dunha insegura vocación que agarda atopala nesta comunidade.
O grupo Muñeiras do Vento, da asociación cultural Muíño do Vento de Canido, en Ferrol, pechará o ciclo Fusa Guillén, o 1 de decembro a partir das 19:00 horas, tamén no Auditorio Municipal, coa sua obra Heroínas cotiás, na que fala do día a día das mulleres do cotidiá, máis aló das mulleres con sona, e coas que compartimos a vida, a historia, as experiencias, as esperanzas, as decepcións, os obxectivos…
