O Concurso de Disfraces de Entroido do Concello da Baña terá lugar o sábado 8 de marzo e haberá premios para as mellores carrozas, comparsas, grupos e disfraces individuais tras o desfile polas rúas da vila
O Concurso de Disfraces de Entroido do Concello da Baña, o vindeiro sábado 8 de marzo, repartirá 3.350 euros en premios tras o desfile que percorrerá as rúas Castelao e Tedelle a partir das 16.30 horas. Os premios repartiranse entre os mellores disfraces nas distintas categorías: carrozas, comparsas, grupos e disfraces individuais.
Así, a mellores carrozas e comparsas gañadoras do Concurso de Disfraces de Entroido da Baña recibirán un premio de 900 euros, concedéndolle ás segundas e terceiras clasificadas 400 e 150 euros, respectivamente. Na categoría de grupos, o primeiro premio será de 150 euros e o segundo de 100 euros. Ademais, tamén se concederán premios individuais, cunha dotación de 100 euros tanto para a categoría infantil como para a de adultos.
Os grupos participantes no Concurso de Disfraces de Entroido da Baña deberán contar cun mínimo de dúas persoas e cun máximo de seis, mentres que as comparsas deberán ter polo menos sete membros. As carrozas tamén precisarán dun mínimo de sete participantes, ademais dun vehículo móbil con tripulación.
Durante o desfile do Concurso de Disfraces de Entroido cada participante -a inscrición pechouse o pasado mércores 19 de febreiro- dispoñerá dun máximo de cinco minutos para exhibir o seu disfrace e a súa actuación diante da escola de música Emilio Andújar. O xurado, composto por persoas alleas á organización, valorará a orixinalidade, a posta en escena e o coidado no vestiario e maquillaxe, especialmente o traballo feito a man e o emprego de materiais de refugallo.
