O Mercado de Nadal 2025 regresa ao pavillón municipal do concello da Baña o vindeiro domingo 14 de decembro, converténdose unha vez máis no punto de encontro destas datas festivas. Unha cita organizada dende a Concellería de Acción Social, Cultural e Servizos á Cidadanía que regresa cun programa variado e pensado para todas as idades.
A inauguración do Mercado será ás 12:00 horas coa apertura oficial e a actuación da Escola de Música Tradicional da Baña, que dará paso, ás 12:30 horas, ao primeiro obradoiro: A miña cociña, o meu lar, con sesións de mañá e tarde para todos os interesados. Xa pola tarde, ás 15:30 horas, será a quenda do grupo As Atrevidas de Monte, que encherán o pavillón de música e diversión, mantendo o espírito festivo e familiar durante toda a xornada.
Ás 16:00 horas, o público poderá participar no obradoiro de coroas naturais, organizado por AFA Avania e dirixido a persoas adultas e a cativada a partir de 6 anos, para o que é necesaria inscrición previa no teléfono 697 342 138.
Ás 17:00 horas, a compañía A Xanela do Maxín presentará Agasallos do Apalpador: palabras e xoguetes un espectáculo familiar no que o Apalpador baixa das montañas do Courel para recuperar palabras en galego esquecidas.
Tras a representación, chegará un dos momentos máis esperados da programación do Mercado de Nadal: a chegada conxunta de Papá Noel e o Apalpador, prevista para as 18:15 horas, seguida de xogos populares abertos a todas as idades ás 18:30 horas. Ás 19:30 horas, darase a coñecer o fallo do concurso de Postais de Nadal en galego, no que participou a mocidade do concello co obxectivo de facer visible o noso idioma nestas datas. Todas as postais estarán expostas na feira, completando así unha xornada cultural e lúdica para todos.
O Mercado de Nadal pechará ás 20:00 horas, despois dunha intensa xornada na que a veciñanza poderán tamén gozar dos tradicionais postos de artesanía, doces típicos e das populares filloas de pedra. O Concello da Baña convida á veciñanza a achegarse ao pavillón para compartir unha xornada festiva, apoiar o comercio local e vivir o espírito do Nadal en comunidade.
