A segunda excursión do programa Coñece o teu país do Concello de Arzúa, que comezou en xuño coa primera viaxe a Betanzos, será unha visita guiada ao barrio indiano de Ribadeo
O departamento de Cultura do Concello de Arzúa informa da apertura do prazo de inscrición para a segunda das excursións da edición deste ano do programa Coñece o teu país. Un ano máis, de maneira totalmente gratuíta, a veciñanza poderá realizar catro excursións ás catro provincias galegas.
Despois de coñecer máis de preto a localidade de Betanzos no pasado mes de xuño, a segunda viaxe será este sábado día 26 de xullo a Ribadeo.
Nesta ocasión farase unha visita guiada ao barrio indiano de Ribadeo para coñecer o legado indiano de finais do século XIX e principios do XX que hoxe é unha parte esencial do atractivo turístico da localidade luguesa.
Máis de medio centenar de casas señoriais, con fachadas ornamentadas, xardíns tropicais e detalles arquitectónicos únicos, conviven con edificios emblemáticos, como escolas, unha praza de mercado, unha traída de augas e a Granxa Escola Agrícola Pedro Murias. O día completarase coa visita ao miradoiro da Atalaia, cun xantar ao carón da Praia das Catedrais e con tempo libre de praia pola tarde.
Todas as persoas interesadas en participar no programa deben achegarse persoalmente á Oficnia de Cultura e Deportes dende onte martes, 22 de xullo, podendo anotar como máximo a un acompañante por cada solicitante. As prazas dispoñibles iranse cubrindo por orde de inscrición, sendo as mesmas limitadas.
