Padrón foi elixido Pobo Máxico de Galicia, un recoñecemento que consolida ao municipio como un dos destinos culturais e patrimoniais máis destacados da comunidade e que impulsan a Rede de Pobos Máxicos de España e o Instituto de Desenvolvemento Local e Estudos Sociais (IDL). Trátase dun recoñecemento aos concellos que sobresaen pola súa protección e divulgación do patrimonio cultural e natural, pola promoción da cultura local e polo seu compromiso co desenvolvemento sostible.
A votación da que Padrón salíu elixido como Pobo Máxico de Galicia, que estivo aberta entre o 3 e o 10 de novembro, reuniu máis de 145.000 participacións en todo o Estado. No caso galego, emitíronse arredor de 13.000 votos, dos que Padrón obtivo o 49,2%, é dicir, uns 6.300 apoios, situándose como o municipio máis votado da comunidade.
O Concello de Padrón agradece profundamente o apoio recibido por parte da veciñanza, asociacións, colectivos, centros educativos, sectores profesionais e persoas de toda Galicia que se implicaron na difusión e defensa da candidatura. Tamén destaca a colaboración e o respaldo de entidades amigas, como o Ayuntamiento de Arjonilla, que contribuíron a lograr este importante resultado.
Cos este título, Padrón reforza a súa presenza na Rede de Pobos Máxicos, da que forma parte desde novembro de 2024, sendo ademais a primeira localidade da provincia da Coruña en incorporarse a este selo de calidade turística e cultural.
Este recoñecemento supón un impulso para continuar fortalecendo a promoción do patrimonio, do turismo sostible e da cultura local, ademais de converterse nunha ferramenta estratéxica para seguir poñendo en valor a singularidade do municipio.
