O Cinema Miúdo de Ames pecha a oitava edición con éxito histórico de público

Cinema Miúdo, Festival Internacional de Cine Infantil recibiu preto de 2.000 persoas que participaron nas proxeccións ou nos obradoiros de efectos especiais e stop motion

O VIII Cinema Miúdo, festival internacional de cinema infantil de Ames, celebrouse do 13 ao 16 de novembro cun programa que combinou proxeccións internacionais, obradoiros creativos e actividades orientadas a reforzar a educación en valores a través do cinema.

O festival presentou unha selección de nove bloques de curtametraxes procedentes de 21 países, incluíu sesións específicas para público escolar e abriu espazo para a reflexión mediante dúas propostas especiais baixo o título Cinema en Valores.

Entre as novidades desta edición do Cinema Miúdo destacaron a incorporación de subtitulado para persoas xordas nunha das sesións e o subtitulado ao galego de numerosas obras internacionais, reforzando o compromiso coa accesibilidade e a lingua propia. Ademais, os obradoiros de efectos especiais e Stop Motion volveron esgotar prazas, confirmando o seu atractivo para o público infantil.

PUBLICIDADE

Cinema Miúdo acolleu ao longo das súas catro xornadas a preto de 2.000 persoas, o que converte esta edición na máis multitudinaria das oito celebradas ata o momento. Ademais das familias de Ames, achegouse público doutros concellos, incluído Santiago de Compostela, consolidando o festival como unha referencia cultural na contorna. O certame está organizado polo Concello de Ames e conta co apoio da Deputación da Coruña. A xestión e programación está feita pola produtora cultural viguesa Abella, con dirección de Juan de Castro.

VIII Cinema Miúdo, clausura e entrega de premios

O VIII Cinema Miúdo pechou o domingo 16 de novembro cunha gala na Casa da Cultura de Bertamiráns presentada por Peter Punk, que encheu o espazo de humor. No acto estiveron presentes o alcalde de Ames, Blas García, e a deputada de Cultura da Deputación da Coruña, Natividade González. Tamén asistiu a familia de Miguel López O Hematocrítico, quen quixo acompañar a entrega do premio honorífico que leva o seu nome.

Os nenos e nenas volveron ser protagonistas desta nova edición, xa que foron eles quen decidiron os Premios do Público a través do xa característico aplausómetro. As familias amesáns amosaron un entusiasmo especial pola selección de curtametraxes internacionais, que fixeron saber aos organizadores ao longo da fin de semana.

A selección oficial de curtametraxes tamén foi avaliada por un xurado internacional formado por tres profesionais de ampla traxectoria no ámbito audiovisual que expresou a súa dificultade de chegar a un veredicto ante a alta calidade da selección amosada. A galega Amaia Mauleón, xornalista e responsable da Vigo Film Office e autora de varios libros infantís; O estoniano Oskar Lehemaa, director de imaxe real e animación, con obras presentes en festivais como Annecy ou Sundance; e a portuguesa Sara Naves, con máis de 15 anos de experiencia en animación tradicional e programadora do Festival Vila do Conde.

Premiados no VIII Cinema Miúdo

PUBLICIDADE