Xociviga desenvolverase desde o 19 ao 23 de novembro no Auditorio Manuel María do Carballiño e baixará o pano desta nova edición coa gala de entrega de premios ás mellores curtas
Xociviga, Festival Internacional de Curtametraxes proxectará un total de 32 traballos de 22 nacionalidades entre o 19 e o 23 de novembro no Auditorio Manuel María do Carballiño. A programación, presentada esta semana no salón de plenos do Concello, inclúe a estrea de 18 curtas internacionais e 4 en España, ademais da estrea mundial de As maos da pulpeira de Silvia Cachafeiro, que inaugurará o festival o día 19.
Diego Fernández, concelleiro de Cultura, puxo en valor a selección de filmes desta segunda edición do novo formato do festival, impulsado polos irmáns Mario e Daniel Fernández Filloy. “O ano pasado foi unha experiencia moi positiva, polo que desde o Concello tratamos que este ano se consolide o novo formato e a veciñanza se achegue a coñecer e desfrutar das curtas seleccionadas”, apuntou o edil, quen
agradeceu o esforzo e traballo dos dous directores artísticos.
A programación do festival arranca o propio día 19 cunha proxección matutina, previa á inauguración. Trátase do filme Fallen Angels (1995) de Wong Kar-Wai. Xa pola tarde, ás 20.30 horas, terá lugar a inauguración coa estrea mundial da curta As maos da pulpeira de Silvia Cachafeiro, rodada no Carballiño e protagonizada por veciñas pulpeiras. A partires do xoves 20 ata o sábado 22 de novembro, terá lugar a proxección dos filmes a competición, divididas durante os tres días en tres bloques de aproximadamente unha hora de duración: ás 17.30, ás 19.00 e ás 20.30 horas.
Os visionados, de balde, levaranse a cabo no Auditorio Manuel María. O festival conta cunha variada selección de curtametraxes internacionais e nacionais, na que se inclúen pezas proxectadas en certames de renome como o Festival de Cannes, o de Berlín ou o de Toronto. Entre elas, destaca The man who
could not remain silent, de Nebojša Slijepčević, curta gañadora do Festival de Cannes de 2024.
Tal e como recordaron os directores artísticos, varias das proxeccións contarán cun posterior coloquio dos equipos técnicos e artísticos dos filmes co público. Toda esta informacion, ademais das curtas que participan nas diferentes seccións, horarios, actividade pódense consultar na páxina web do festival.
O domingo 23 de novembro, último día, a programación comezará ás 11.30 horas co visionado do filme de animación Balto de Simon Welles, recomendado para todas as idades e especialmente, para público infantil. Xa pola tarde, pecharase o certame coa proxección ás 17.30 horas das curtas favoritas do público e, ás 19.00 horas, coa gala de entrega de premios.
