A XV Carreira Popular de Cariño dispútase o domingo 10 de agosto, con saída e chegada no Paseo Marítimo, nas categorías sénior, veteráns, infantís e menores de idade
A XV Carreira Popular Concello de Cariño vén de abrir o prazo de inscrición para participar nunha cita xa consolidada no calendario deportivo comarcal que terá lugar o domingo 10 de agosto. A proba, organizada polo Goberno local, conta coa colaboración de Eroski City de Cariño, Arthros Fisioterapia e da Deputación da Coruña.
As inscricións na Carreira Popular, que son de balde e permanecerán abertas ata o luns 4 de agosto, poderán formalizarse a través da web cronotec.es, na que tamén se pode consultar o regulamento, as distancias por categoría e o cartel oficial da proba. Non se admitirán inscricións fóra de prazo nin o mesmo día da carreira.
A saída e a chegada da Carreira Popular de Cariño terán lugar no Paseo Marítimo, á altura da Casa do Concello, ofrecendo un percorrido accesible e con vistas excepcionais. O programa arrincará coa saída das categorías sénior e veteranos ás 10:00 horas, e a partir das 11:00 horas será a quenda das categorías infantís e menores de idade.
Os dorsais poderán retirarse o venres 8 de agosto, de 12:00 a 13:30 horas no Servizo de Deportes da Casa do Concello, ou o día da carreira, de 9:20 a 9:50 horas, no vestíbulo do propio Concello. Dende a organización, solicítase a colaboración da cidadanía evitando o tránsito polo Paseo Marítimo durante a celebración da proba, co fin de facilitar o correcto desenvolvemento da mesma.
Ademais, as persoas interesadas en colaborar como voluntarias na organización poden enviar un correo electrónico a davidfernandez@concellodecarino.gal, indicando nome, apelidos e teléfono de contacto. Contactaráselles durante a primeira semana de agosto para coordinar as tarefas asignadas.
A concelleira de Deportes, Laura García, explicou que “a Carreira Popular de Cariño é xa unha cita clásica do verán e un reflexo do compromiso deste Concello co deporte e a vida activa. Nesta XV edición volvemos apostar por unha proba pensada para todas as idades, cun percorrido inmellorable ao longo do noso Paseo Marítimo”, incidiu.
