O primeiro intinerario do ‘SendAres’, o domingo 20 de outubro, transitará pola Igrexa de Santa Olaia ou pola antiga vía ao Mosteiro de Caveiro
O Concello de Ares vén de anunciar a apertura do prazo de inscrición para participar na primeira das rutas que forman parte do programa municipal SendAres 2024-2025, que organiza a través do departamento de Deportes.
Dende o pasado xoves 19 de setembro, ás 14:00 horas, as persoas interesadas xa poden formalizar a súa reserva de prazas a través da páxina web do Concello de Ares: www.concellodeares.gal.
No primeiro dos itinerarios programados para esta nova tempada, os sendeiristas achegaranse até a Igrexa de Santa Olaia de Soaserra, en Cabañas, descendendo logo ata o Camiño dos Encomendeiros e percorrendo a antiga vía de acceso ao Mosteiro de Caaveiro, unha senda na que aínda resoan os ecos da historia.
Todos os participantes deberán levar tentempé, pois organizarase un xantar durante o desenvolvemento da ruta de sendeirismo. Esta primeira camiñada organizarase o domingo 20 de outubro, e contará cun percorrido de 14,5 quilómetros e unha dificultade alta.
Prezo e reserva de praza primeira ruta SendAres 22024-2025
Partirá dun prezo de 15 euros con servizos de guía, seguros e transporte de ida e volta incluídos. No tocante aos horarios de desprazamento, o autobús partirá dende a Praza da Igrexa de Ares ás 8:30 horas e regresará á vila contra as 17:00 horas.
A área de Deportes do Concello de Ares, oferta para esta primeira ruta un total de 25 prazas, e que se irán cubrindo por orde de solicitude até o vindeiro 7 de outubro ás 23:59 horas, ou ata o esgotamento das mesmas, tendo preferencia as persoas empadroadas no Concello de Ares.
