O I Torneo Pich and Putt, que se enmarca dentro do programa das Festas do Apótolo 2025, abriu hoxe o seu prazo de inscrición ata o vindeiro 24 de xullo
O Torneo Pitch and Putt Cidade de Santiago terá lugar os vindeiros 25 e 26 de xullo no campo de golf da Sionlla, nunha cita deportiva que se enmarca dentro da programación das Festas do Apóstolo 2025, está organizado conxuntamente polo Compostela Golf e polo Concello de Santiago, e foi presentado esta mesma mañá.
O Torneo Cidade de Santiago desenvolverase no campo da Sionlla, na parroquia de Enfesta, que conta cun percorrido de 18 buratos especializado na modalidade na que se vai a disputar o campionato e caracterizado pola súa calidade técnica como pola beleza natural da súa contorna.
A concelleira Pilar Lueiro destacou durante a presentación do torneo que, dende a súa inauguración hai dous anos, este campo acolleu xa varios campionatos cunha excelente acollida por parte dos xogadores e afeccionados, polo que agarda que se repita ese éxito nesta primeira edición do Torneo Cidade de Santiago.
O Concello anima á veciñanza compostelá a participar activamente no torneo, para o que é necesario estar federado, ou cando menos a achegarse como público, coñecer o campo e apoiar o esforzo das persoas emprendedoras que apostaron por este proxecto deportivo dentro do termo municipal.
Iniciativas coma este Torneo de Pich and Putt sitúan a Santiago como un referente no deporte galego, facendo da nosa cidade, unha vez máis, a capital deportiva de Galicia durante unha fin de semana de celebración” (Pilar Lueiro, concelleira de Festas)
Pola súa banda, David Senra, coodinador de xestión de Compostela Golf, detallou algúns dos aspectos técnicos e organizativos do torneo, animando a todas as persoas interesadas a inscribirse e desfrutar dunha experiencia deportiva única.
O torneo xogarase na modalidade Fourball Stroke Play 18 buratos, con percorrido largo, para as categorías Scratch, HCP 1 e HCP 2, por parellas, cun límite de 72 persoas por cada horario de saídas: venres 25, ás 10:30 horas; sábado 26, 10:30 horas; e sábado 26, ás 17:00 horas.
Haberá entrega de premios e sorteo para todos os participantes. O prazo para formalizar as inscricións neste I Torneo Pich and Putt Cidade de Santiago abriuse hoxe mesmo e os interesados poden facelo ou ben a través da páxina web de Compostela Golf ou chamando telefónicamente ata o vindeiro 24 de xullo.
