O edil do PP de Santiago, José Ramón de la Fuente, denuncia o deixamento por parte do Goberno de Goretti Sanmartín, que aprazou o encontro porque se esqueceu de comprar os trofeos e as medallas
O PP de Santiago, a través do seu edil, José Ramón de la Fuente, denunciou a situación “surrealista” tamén da concellería de Deportes do goberno local, quen vén de suspender a final da Copa de Santiago, que tiñan que disputar o CD Belvís e o Amio SD o pasado domingo, 16 de xuño, e que finalmente tivo que ser aprazado.
O goberno local, explicou De la Fuente, comunicoulles a ambos clubs esta situación tan só dous días antes da data prevista e anunciada para a súa celebración, o motivo: a final non podía disputarse, porque se esqueceron de mercar os trofeos que debían entregarse aos participantes.
De la Fuente destacou que “todo lle viña dado e organizado pola Federación Galega de Fútbol e polos clubs, os nacionalistas só tiñan que garantir a disposición do campo de fútbol e que houbera trofeos e medallas para os xogadores”.
“Non é de recibo que o goberno nacionalista xogue co esforzo e a ilusión de xogadores e afeccionados, sobre todo, tendo en conta que só tiña que ocuparse dunha cousa, comprar os trofeos para gañador e finalista e, nin sequera, é capaz de facer iso” (José Ramón de la Fuente, concelleiro do PP en Santiago)
O edil do PP de Santiago remarcou que na concellería de Deportes “se xuntan a fame e as gañas de comer, contamos cunha falta de efectivos evidente, totalmente insuficiente para atender, de forma adecuada, as necesidades do amplo tecido deportivo da cidade”.
“Estamos ante unha concellería moi mal planificada”, xa que aglutina materias tan esenciais para a cidade como: deportes, relacións veciñais, festas, rural e a UMAD, o que demostra, incidiu De la Fuente, “o pouco que lle interesan a este goberno estes asuntos, ademais evidencia un claro desleixo e falta de xestión”.
O edil do Partido Popular de Santiago, subliñou que, dende que comezou o actual mandato “o BNG non fai máis que ir a remolque, sempre por detrás dos acontecementos o que lles está a supoñer un importante prexuízo a todas as veciñas e veciños de Santiago, que son os que padecen as consecuencia dunha xestión sen ideas e neglixente”.
Finalmente, José Ramón de la Fuente destacou que “o BNG esta errando na determinación de prioridades, vese claramente na súa política de recursos humanos, posto que ten a concellaría de Deportes infradotada e os cadros de Policía local e servizos de extinción de incendios por debaixo dos mínimos recomendables”, pero subliñou o popular “non perdeu o tempo en crear e cubrir prazas de alta dirección ou de asesoramento e asistencia, que pode cubrir a dedo entre os membros da súa lista electoral que non saíron elixidos”.
