Os cursos de iniciación ao surf para menores de idade desenvolveranse en varias quendas durante o mes de xullo, ofértanse un total de 36 prazas e os interesados poden inscribirse na piscina municipal de Ortigueira
O Concello de Ortigueira vén de poñer en marcha os cursos de iniciación ao surf dirixidos a persoas menores de idade, de 10 a 17 anos, na praia de San Antonio, en Espasante, e que se desenvolverán durante o mes de xullo en dúas quendas.
Así, ofértanse un total de 36 prazas para a mocidade e dividirase en dúas quendas: do 30 de xuño ao 4 de xullo (18 prazas) e do 7 ao 11 de xullo (18 prazas). Os horarios aínda están pendentes de determinar e o prezo por inscrición é de 12,60 euros.
Os cursos de iniciación ao surf serán impartidos por profesorado titulado e a empresa que o realiza facilitará ao alumnado os traxes de neopreno e as táboas de surf. Unha actividade que dá preferencia aos menores empadroados no municipio, e será imprescindible que saiban nadar. Aínda así, realizanrse probas de natación previas ao curso e poderá non admitirse aos alumnos que non naden adecuadamente.
As persoas interesadas poderán inscribirse na piscina municipal de Ortigueira ou chamando ao 981 42 20 26, en horario de 10:00 a 12:00 horas. As inscricións pecharanse dous días antes do comezo dos cursos de iniciación ao surf. En caso de ter máis solicitudes que prazas dispoñibles, realizarase un sorteo das mesmas e notificarase ás persoas interesadas, xa que as prazas non se atribuirán por orde de inscrición.
O alcalde do Concello de Ortigueira, Valentín Calvín, anima a mocidade da vila a “apuntarse a esta iniciativa que fomenta o exercicio ao aire libre, o respecto e coñecemento do medio acuático, e materializa a aposta do goberno local polo deporte e os seus valores”.
