A xunta de Goberno local de Ferrol aprobou o proxecto básico e de execución refundido de actuacións no castelo de San Felipe. Así o informou o alcalde ferrolán, José Manuel Rey Varela. Así pois, avanzou que se executarán as adecuadas solucións arquitectónicas e construtivas para a intervención na batería alta e a denominada Casa do Comandante, tamén referida como Casa do Gobernador, do castelo de San Felipe.
“Tivemos que actualizar o proxecto, que viña do anterior mandato, e xa contamos tamén con todas as autorizacións necesarias para poder licitar estas melloras”, explicou Rey Varela. Neste sentido, a administración local recibiu o pasado mes os informes favorables de Patrimonio e de Medio Ambiente.
A actuación forma parte do proxecto da candidatura de Ferrol a Patrimonio da Humanidade. Neste sentido, o rexedor asegura que “o castelo de San Felipe é unha auténtica xoia”. “Poremos en valor o castelo de San Felipe e a batería alta, recuperándoos e exaltando a súa beleza e valor patrimonial para que sigan sendo un reclamo turístico máis”, engadiu.
PROXECTO DE RECUPERACIÓN DO CASTELO
Neste senso, o proxecto detalla tres actuacións previstas. A actuación 1, relativa á conservación e mantemento da Batería Alta do s. XVI, contempla limpar e reparar os muros, pavimento e xardín. A maiores, como proposta do equipo redactor, exponse tamén limpar e recuperar o solado granítico no interior da batería, así como completar unha zona de acceso con pedra similar, a recuperación dos caños graníticos que conducían a auga á gárgola existente e mellorar a seguridade do espaldón cunha nova varanda.
A actuación 2 consiste na rehabilitación inicial da Casa do Comandante e a súa contorna. Contempla traballos de consolidación e reparación das estruturas murarias existentes, a reconstrución de estrutura horizontal da planta alta dunha das edificacións, así como da escaleira de comunicación coa planta baixa e a reconstrución das cubertas desaparecidas respectando os sistemas construtivos orixinais.
Por último, a actuación 3 céntrase na rehabilitación final da Casa do Comandante e a súa contorna e a adecuación para o seu uso como cafetería. Rey Varela recordou que “as persoas que visitan o castelo non poden gozar dun servizo mínimo de restauración de bebidas nin comidas, nin no interior do castelo nin na contorna do núcleo”. A Casa do Comandante encaixa para poder aloxar un local de restauración onde se poida ofrecer un servizo de cafetería e gozar das vistas privilexiadas da ría de Ferrol.
Por iso, dotarase dunha cafetería a este espazo e contará cunha terraza exterior. Trátase dunha prolongación natural do espazo público central da cafetería, pero a un nivel lixeiramente inferior, evitando barreiras arquitectónicas que cobren notoriedade en si mesmas a favor da integración e o paso natural entre elementos.
As actuacións previstas contan cun orzamento de 1.168.983,86 euros. O Concello de Ferrol aporta 211.040 euros e 957.943 proceden de Fondos de Transición Xusta. O prazo de execución previsto é de 11 meses.
