O Consello da Xunta aprobou esta mañá declarar o novo Centro Integral de Saúde Novoa Santos de Ourense como proxecto público de urxencia e de excepcional interese.
Con este acordo, para a tramitación das obras do novo equipamento sanitario por Lei 3/2016, o Executivo galego achegará celeridade á construción do que será o primeiro Centro Integral de Saúde da provincia ourensá.
Así, tras supervisar e aprobar o seu proxecto de execución, no que se determinará o orzamento final necesario, a Xunta licitará as obras. Non obstante, o investimento estimado supera os 14 millóns de euros.
DETALLES DO FUTURO CENTRO INTEGRAL
A actuación recollerá os traballos de demolición do actual inmoble e a construción da nova infraestrutura sanitaria, que atenderá a unha poboación de 130.000 persoas. O futuro equipamento sanitario de vangarda distribuirase en 13 andares, cun semisoto, un baixo e once andares; e contará cunha superficie construída de 7.584 metros cadrados.
Deste xeito, o Executivo galego reforzará a atención sanitaria da cidade de Ourense incorporando novos servizos. Ademais, integraranse no mesmo espazo o Punto de Atención Continuada (PAC) e ampliarase a atención médica e de enfermería fóra do horario ordinario.
Así mesmo, a maior dispoñibilidade de espazo permitirá incorporar novos servizos, como programas de rehabilitación integral (solo pelviano, enfermidades musculoesqueléticas e rehabilitación cardíaca), así como ampliar a dotación de recursos, estruturais, diagnósticos e humanos. Ademais, permitirá incorporar novas unidades de diagnóstico, con equipos e salas de ultrasóns e radiodiagnóstico; de saúde mental e de rehabilitación.
As instalacións do novo CIS Novoa Santos de Ourense disporán dunha área asistencial de atención clínica, con 33 consultas de medicina, enfermería, farmacia, odontoloxía e hixienista. Tamén contará con 4 salas polivalentes e 4 salas de docencia; ademais das correspondentes salas de técnicas, de tomas de mostras e de espera de pacientes. A maiores, terá unha área de pediatría, con 4 consultas médicas e de enfermería, unha sala polivalente e unha sala de lactancia.
Xunto con isto, engádese a área de atención á muller, con 2 consultas, e incluirá o Centro de Orientación Familiar (COF), con dúas consultas de obstetricia, unha de enfermería e outra de psicoloxía.
Finalmente, contará con novas unidades, como a área integral de rehabilitación, cunha consulta de fisioterapia, un ximnasio con 6 cabinas de tratamento e unha sala de rehabilitación. Tamén unha área de saúde mental, con 17 consultas de psiquiatría, enfermería, traballo social, psicoloxía e docencia. Para rematar, a área de radiodiagnóstico, cunha nova sala específica de diagnóstico por ultrasóns, de nova creación, e unha sala de ecografía, ademais dunha área específica de telemedicina.
