O alumnado galego competidor no SpainSkills alzouse con sete medallas na competición celebrada en Madrid. Máis en concreto lograron dúas de ouro, dúas de prata e tres de bronce.
Un total de 37 estudantes representaron a Galicia no campionato de Formación Profesional Spainskills. Os competidores foron os gañadores de GaliciaSkills, o campionato autonómico organizado pola Consellería de Educación, Ciencia, Universidades e FP o pasado mes de outubro. Destes, sete alumnos lograron medallas.
Máis en concreto, obtiveron dous ouros; en Tecnoloxía do automóbil, polo representante do CIFP Politécnico de Santiago, e en Tecnoloxía de vehículos pesados, polo CIFP Someso. Dúas pratas, en Mecatrónica, cos alumnos Xoel Teijero Prado e o toqués Abraham Martín Corral; e en Panadaría, representando ao coruñés CIFP Paseo das Pontes. Finalmente, lograron tres bronces en Desenvolvemento web, Ebanistaría e TIC Administración de sistemas en rede; con representantes do IES Ramón María Aller Ulloa, o IES Plurilingüe Antón Losada Diéguez e o IES San Clemente.
Representantes da Consellería de Educación, Ciencia, Universidades e FP, encabezados pola directora xeral de FP, Eugenia Pérez, acompañaron aos equipos participantes na competicióN. Así pois, aproveitaron para felicitar aos gañadores polo talento, a capacitación técnica e a excelencia demostrada.
Neste sentido, a Xunta de Galicia avala a aposta do Goberno galego por unha “Formación Profesional moderna, innovadora e conectada co tecido produtivo que destaca especialmente pola implicación do alumnado e o profesorado”.
