A delegada territorial da Xunta en Ferrol, Martina Aneiros, visitou esta mañá o servizo de atención residencial e diúrna de Aspanaes, en San Pedro de Leixa. O obxectivo era de comprobar o resultado das obras que a entidade está a acometer con cargo a unha axuda autonómica. Dita achega está destinada á realización de programas de interese xeral para fins de carácter social, con cargo á asignación tributaria do 0,7% do imposto sobre a renda das persoas físicas e do imposto da sociedade que xestiona a Consellería de Política Social e Igualdade.
Así pois, Aspanaes foi receptora dunha subvención de 80.890 euros para acometer unha serie de reformas interiores e de modernización de zonas comúns do inmoble, coa fin de adaptar os espazos ás necesidades dos usuarios. Así, substituíuse o pavimento vinílico e o rodapé existente e colocáronse novas portas semimacizas de madeira e os marcos de dúas ventás fixas da zona de cafetería. Ademais acometéronse novas soleiras interiores nas fiestras a base de chapa de aluminio anodizado e procedeuse ao pintado dos paramentos verticais e horizontais dos espazos.
Durante a visita, a delegada territorial aproveitou a ocasión para poñer en valor o traballo que Aspanaes desenvolve. Neste sentido, salientou a atención ás persoas usuarias con autismo na súa etapa de vida adulta e a mellora da súa calidade de vida. Actualmente, a Xunta de Galicia financia no centro 30 prazas de atención residencial terapéutica e outras sete prazas de atención diúrna terapéutica.
CONVOCATORIA DE 2024 ABERTA
Aneiros lembrou que as entidades do terceiro sector de acción social teñen de prazo ata o 21 de outubro para presentar as solicitudes á convocatoria de 2024. Esta conta cun orzamento de 27,8 millóns de euros para actuacións no ámbito da familia, infancia e dinamización demográfica; de inclusión social, de promoción da autonomía persoal e apoio de persoas con discapacidade, proxectos de investimento e adecuación de centros e unidades de atención destinados a persoas con discapacidade ou proxectos de investimento e adecuación de centros e unidades de atención destinados a persoas en situación ou risco de exclusión social.
Tamén serán subvencionables con cargo a esta convocatoria as actuacións de promoción da igualdade entre mulleres e homes e de prevención e loita contra a violencia de xénero, de promoción da autonomía persoal de apoio a persoas maiores e dependentes e proxectos de investimento e adecuación de centros e unidades de atención destinados a persoas maiores e a persoas dependentes ou de centros destinados á infancia do sistema de protección e reforma xuvenil.
