Andaina Pro Salud Mental escolleu a Biblioteca Municipal do Concello de Ordes para presentar o seu último proxecto. Trátase do receitario solidario Cociña con Andaina, unha publicación realizada co gallo do seu décimo quinto aniversario celebrado este ano.
Cociña con Andaina é unha ampla recompilación das receitas elaboradas nos obradoiros de cociña da asociación, os cales forman parte do programa de actividades que se desenvolven nos centros situados en Ordes e Dodro. Susana García, concelleira de Política Social do Concello, non quixo perder a ocasión de participar nesta presentación, momento que tamén aproveitou para felicitar o Nadal a todas as persoas presentes.
Cociña con Andaina está á venda nos establecementos colaboradores espallados pola vila de Ordes, así coma a través do teléfono 613 071 703.
