A mostra de pintura de Xurxo Ameneiro, baixo o título ‘Cousa de dous’ recolle unha trintena de traballos en diferentes técnicas e formatos do amiense
O Centro Empresarial do Trambre de Santiago acolle, ata o vindeiro 16 de maio, a exposición do pintor amiense Xurxo Ameneiro, Cousas de dous. A mostra está composta por unha trintena das pinturas do seu pasado, presente e futuro elaboradas con diferentes técnicas e en diversos formatos.
Cousas de dous é unha referencia ao apoio da esposa de Ameneiro que o animou a afondar na pintura, facilitándolle un rocho para desenvolver a súa paixón, e máis adiante acondicionando un baixo que se converteu no seu estudo, un espazo de luz natural de 25 metros cadrados.
A exposición de Xurxo Ameneiro está composta por 30 obras que abarcan os seus trinta anos de dedicación pictórica, que reflicten o pasado, presente e futuro da súa vida. Amosa obra en pequeno formato (20x30cm), obra mediana de 70×80, e tamén algunhas que sobrepasan os 100×90 centímetros, a maior parte delas creadas ao óleo e outra parte en pastel, ben sobre papel de arroz, vexetal, celulosa, tablilla e lenzo.
As obras representan o meu pasado con ideas convulsas e enfrontadas, o presente con moita luz e positividade, e un futuro contemplativo e relaxado” (Xurxo Ameneiro, pintor)
A exposición Cousa de dous de Xurxo Ameneiro poderase visitar ata o 16 de maio, en horario de luns a venres de 9:00 a 14:00 horas e de 16:00 a 20:00 horas (recoméndase avisar previamente da visita no teléfono 981 55 28 50).
Xurxo Ameneiro Rodríguez naceu no Milladoiro (Ames, 1968), á beira da Capela da Magdalena. Cursou estudos en Calo e no Colexio Peleteiro de Santiago. Despois dun ano en Ferrol, no Corpo de Artillería, e de varios traballos, comezou o seu labor no sector da hostalería, concretamente, na desaparecida Bodeguilla de San Roque, preto do Centro Galego de Arte Contemporánea en Santiago, que durante anos foi centro de reunións, encontros e tertulias de boa parte dos artistas galegos en todas as súas modalidades. Así, como pintor autodidacta, Xurxo Ameneiro percorreu todas as salas e museos de Compostela avivando a súa inquedanza creativa.
