A 44ª Carreirta Popular de Pascua contou na liña de saída con preto de 700 deportistas e o Atletismo Sar revalidou o título de club con maior participación
A 44ª Carreira Pedestre de Pascua do Concello de Padrón, que forma parte do programa de festas municipal, desenvolveuse o pasado sábado 19 de abril condicionado pola choiva, mais tomaron a saída case 700 atletas nas diferentes categorías. A corredora do SD Compostela de Atletismo, Tina Fernández Barreiros, e o deportista do Club Atletismo Sar, Nicolás Domínguez García, foron os primeiros en chegar á liña de meta proclamándose campións desta nova edición da proba.
Así, Tina Fernández subiuse ao máis alto do podio na categoría feminina despois de para o crono cun tempo de 52:09 minutos, 18 segundos máis que Silvia García Lorenzo (Club Atletismo Noia) que foi segunda cun tempo de 52:27 minutos, e da triatleta padronesa Martina López Gestal, tamén da SD Compostela, que foi terceira parando o cronómetro en 52:31 minutos e recibiu o premio á mellor atleta local.
No grupo masculino, Nicolás Domínguez proclamouse vencedor absoluto cun tempo de 43:29 minutos. Completaron o podio, Francisco Javier Ascanio (43:34 minutos) e o atleta local Martín Lestido (43:38 minutos), do CA Sar, que revalidou o recoñecemento como mellor padronés da proba, igual que na pasada edición.
O atleta máis veterano en completar a carreira nesta nova edición da Carreira Popular de Pascua foi o ferrolán Jesús Bernal, que aos seus case 78 anos segue a demostrar a súa paixón polo atletismo, sumando quilómetros e participacións en probas por toda Galicia. Na clasificación por clubs, o Club Atletismo Sar volveu ser o equipo con maior número de participantes e acadou tamén o primeiro posto como mellor conxunto, por diante da SD Compostela e do Triatlón Vilagarcía.
Gañadores da Carreira Popular de Pascua por categorías
| Categoría | Podios |
|---|---|
| Sub-20 masculino | Eros Pardal, Saúl Alcalde e Mario Alcalde. |
| Sub-23 feminino e masculino | Gañadores: Paula Quintela e Hugo Calvo. |
| Sénior feminino e masculino | Raquel Fernández, Ana Eirís e Aldara Betanzos; e Damián González, Esteban Martín e Nicolás Mollinedo. |
| Máster 1 | Elisa Boullosa, Nuria Mejuto e Paula Trillo; e Ismael García, Xacobe Fontán e Arturo Domínguez. |
| Máster 2 | Marga Villaverde, Sonia Agrasar e Silvia González; e Roberto Carlos Agrelo, Victor González e Fernando Vázquez. |
| Máster 3 | Elena Miguens, Elena Torea e Patricia Argiz; e Santiago Falcón, Ángel Maceiras e Xosé Antón Barreiro. |
| Máster 4 | María del Rosario Morales, María Begoña Ramos e Elvira Tresguerras; José Suárez, José Carlos Graña e Santiago Álvarez. |
| Sub-10 | Gabriela López, Daniela Pacheco e Xeila Mateos; e Nico Camino, Mateo Vilela e Luca Ramos. |
| Sub-12 | Icía López, Celia Mella e Alma Vicente; e Nicolás Amado, Antonio Sanmartín e Xián Martínez. |
