As Aulas Sénior de Padrón ofrecerán actividades deportivas de ximnasia de mantemento e andainas saudables dirixidas aos máis maiores e que teñen como obxectivo promover hábitos de vida saudable e o envellecemento activo
O Concello de Padrón, en colaboración con ATEGAL, organiza o novo ciclo de actividades deportivas dirixidas á poboación sénior do municipio que se desenvolverán durante os meses de xuño e xullo dentro do programa das Aulas Sénior de Padrón.
A proposta de actividades deportivas inclúe dúas modalidades pensadas para fomentar o benestar e a vida activa. Así, a ximnasia de mantemento oferta dúas opcións horarias: un primeiro grupo os luns e mércores de 9:15 a 10:15 horas, e un segundo os martes e xoves de 9:15 a 10:15 horas. Cada grupo contará cun máximo de 30 prazas.
Por outra banda, as andainas saudables do programa de actividades deportivas terán lugar todos os martes e venres, durante estes dous meses, en horario de 9:00 a 10:30 horas, tamén con 30 prazas dispoñibles.
Todas as persoas interesadas poderán formalizar as súas inscricións a partir de mañá xoves 15 de maio no Centro Social–Aulas Sénior de Padrón (Campo do Souto nº 2) ou ben chamando ao número de teléfono 981 811 329. O prezo da actividade é de 5 euros por persoa.
Dende o Concello de Padrón indican que esta iniciativa ten como obxectivo promover hábitos de vida saudable, a socialización e o envellecemento activo, ofrecendo espazos de encontro e coidado físico nun ambiente próximo e adaptado ás necesidades da veciñanza de maior idade.
