A palista Marta Canosa recibe a Carabela de Prata de Ferrol á mellor deportista do 2024

Marta Canosa recibiu a Carabela de Prata, máxima distinción que concede o Concello, durante a celebración da XXX Gala do Deporte Ferrolán que se desenvolveu no Auditorio

A palista de caiac polo, Marta Canosa Maceiras, foi a gañadora da Carabela de Prata do Concello de Ferrol á mellor deportista do 2024. O seu nome deuse a coñecer na XXX Gala do Deporte Ferrolán, que se desenvolveu na tarde do pasado martes 22 de abril no Auditorio e presidida polo alcalde da cidade, José Manuel Rey Varela.

É a terceira vez que Marta Canosa está nominada a este galardón, se ben entre a Gala do Deporte Ferrolán do ano pasado e a desta edición conseguiu un destacado fito, que se suman aos que xa ostentaba: a medalla de prata no Mundial Sub-21 de caiac polo. Canosa estivo nominada nesta ocasión xunto á triatleta Miriam Casillas e á judoka June Moreno Campo.

Durante a Gala do Deporte Ferrolán, tamén se fixo entrega de 61 premios por modalidades deportivas e se concederon catro mencións especiais polos méritos deportivos acadados no ano 2024 ao Baxi Ferrol, ao equipo élite masculino do Club Tríatlon Ferrol; a Jesús Prieto Freire, que obtivo o título de subcampión en +120 quilos no Mundial máster de powerlifting, e á remeira Iria Jarama Díaz do Club San Felipe Ferrol.

PUBLICIDADE

Asemade, durante a Gala do Deporte Ferrolán entregouse outras dúas mencións especiais pola proxección internacional da cidade e do deporte ferrolán a Álvaro Fernández Carreras, futbolista do Benfica, e a Alberto Abalde Díaz, xogador do Real Madrid Baloncesto.

A Gala do Deporte tamén outorgou tres galardóns especiais á Comisión Naval de Regatas de Ferrol, que celebra o seu 75º aniversario; ao Club Montaña Ferrol, que conmemora o seu 25 aniversario; e ao Club Baloncesto Aurum, iniciativa que reúne a ex xogadoras de Ferrolterra. Os tres clubs representan o espírito deportivo e o compromiso co enriquecemento cultural e social de Ferrol.

O alcalde José Manuel Rey Valreal, que presidiu a Gala do Deporte, felicitou a todos os premiados así como a aqueles que recibiron unha mención especial por parte do xurado nunha celebración na que se fixo entrega de máis de 70 premios, recoñecementos e distincións.

Hoxe celebramos o deporte ferrolán e aplaudimos o talento e o traballo dos nosos deportistas, mais gustaríame destacar os logros e os triunfos acadados polas tres deportistas que este ano estiveron nominadas á Carabela de Prata” (José Manuel Rey Varela, alcalde de Ferrol)

HOMENAXE A JAVIER GÓMEZ NOYA

A gala deste ano tamén serviu como recoñecemento á traxectoria profesional de Javier Gómez Noya, Fillo Predilecto de Ferrol, que anunciou a súa retirada das competicións o pasado ano. O rexedor lembrou os seus numerosos éxitos no triatlón, como os seus cinco títulos mundiais, catro títulos europeos ou a súa medalla de prata nos Xogoso Olímpicos de Londres 2012.

Estes éxitos, sumados a outras moitas victorias, encumbraron ao ferrolán á “élite internacional do deporte, pero isto non fixo que esquecese as súas raíces”. A súa carreira deportiva “converteuno no máis importante dinamizador da práctica do deporte na nosa cidade e estou seguro de que non me equivoco ao dicir que algúns dos rapaces e rapazas que están hoxe aquí deron os seus primeiros pasos no deporte grazas a Javier”, matizou Rey Varela que incidiu en que Gómez Noya deixa un legado profesional que “queda para sempre gravado na historia do tríatlon e no corazón de Ferrol”.

PREMIADOS NA XXX GALA DO DEPORTE FERROLÁN POR MODALIDADES DEPORTIVAS

PUBLICIDADE