A apertura das piscinas municipais ao público de Ordes e O Pino realizarase o día 20 de xuño, mentres que o Concello de Rois abrirá as súas instalacións ao día seguinte, o sábado 21 de xuño
As piscinas municipais dos Concello de Ordes, O Pino e Rois abrirán ao público, coa chegada da calor, a finais deste mes. Así, os municipios de Ordes e O Pino abrirán as súas instalaciónso vindeiro 20 de xuño, mentres que o Concello do Pino farao ao día seguinte, o sábado 21.
Así, a piscina do Múíño en Ordes permanecerá aberta ata o 31 de agosto, e dende onte 9 de xuño xa se poden solicitar os carnés de abonados, presencialmente no departamento de Deportes en horario de mañá, ou ben electrónicamente nesta páxina web.
O carné para toda a tempada ten un prezo de 12 € para os menores e de 20 € para persoas adultas. De preferir collelo por meses o de xuño ten un custo de 2,10 € e 4,25 €; mentres que para xullo e agosto ascende a 6 € e 12 € para menores e adultos, respectivamente. Por outra banda, para días soltos o prezo da entrada individual será de 1 € e de 1,5 €.
Un ano máis o Concello de Ordes tamén convoca os cursos de natación para os meses de xullo e agosto que de luns a venres se impartirán en horario matutino na mesma piscina do Muíño. Estes están dirixidos á rapazada de 3 a 16 anos e teñen un custo de 20 euros mensuais. Tamén, se ofertan clases intensivas de natación. Toda a información sobre os mesmo e os prazos está dispoñible o teléfono 981 697 537.
Pola súa banda, o Concello do Pino tamén abrirá as instalacións da piscina municipal de Lameiro o día 20 de xuño, todos os días da semana, en horario de ininterrompido de 12:00 a 20:00 horas. Poderá accederse con entrada diaria ou coa adquisición dos abonos na Casa do Concello de luns a venres de 10:00 a 14:00 horas. O Concello mantén os prezos do ano pasado tanto para as entradas diarias como para os abonos, que dependerán da idade, e haberá descontos para familias e persoas empadroadas.
Ademais, O Pino tamén oferta cursos de natación dirixidos a persoas de todas as idades, mantendo tamén os mesmos prezos do verán pasado. Os cursos desenvolveranse de luns a xoves, de 12:30 a 13:15 horas, e será preciso contar cun abono de tempada para poder inscribirse. A información sobre os cursos e para o uso da piscina (prezos, horarios, descontos…) pódense consultar na web do Concello ou ben presencialmente na casa consistorial.
Pola súa banda, o Concello de Rois abrirá as instalacións da piscina municipal de Senra ao día seguinte de Ordes e O Pino, o sábado 21 de xuño, nunha campaña de verán que está ano conta como novidade destacada coa posibilidade de dispoñer dun carné para acceder ás instalacións, mellorando e axilizando o servizo, e que se pode solicitar dende mañá 11 de xuño, enviando un correo a inscricions@rois.gal, indicando o nome, apelidos e enderezo, xunto a ao xustificante de pagamento.
As persoas empadroadas no Concello de Rois poderán beneficiarse de tarifas moi reducidas ou mesmo acceso gratuíto no caso dos menores de 10 anos. O prezo xeral da tempada para maiores desa idade será de 5 euros, mentres que as familias completas poderán adquirir o carné por 12 euros. Ademais, haberá un desconto do 15 % para familias numerosas, monoparentais ou con algún membro cunha discapacidade igual ou superior ao 33 %.
As persoas non empadroadas ou que non dispoñan do carné poderán acceder igualmente á piscina, pagando a entrada diaria correspondente: o acceso será gratuíto ata os 3 anos, terá un custo de 1 euro ao día para nenas e nenos de entre 4 e 10 anos, e de 2 euros para as persoas maiores de 10 anos. Para máis información, pódese contactar co Concello no 981 816 061 ou acudir ao propio edificio multiúsos.
