O 37º Rally Cidade de Narón, proba puntuable por primeira vez para o Campionato de España de Asfalto, disputarase esta fin de semana sobre 5 tramos, cun total de 418 quilómetros, dos que 119,78 serán cronometrados
O 37º Rally Cidade de Narón xa quenta motores para disputarse este sábado 24 de maio. Unha proba que por primeira vez será puntuable para o Campionato de España de Rallyes de Asfalto, e na que os seus participantes percorrerán un tramo de 418 quilómetros o sábado, dos que 119,78 serán cronometrados e que discurrirá polos concellos de Narón, San Sadurniño, Moeche, Cerdido, As Somozas e, tamén este ano, Valdoviño, segundo informaron durante a presentación que se desenvolveu esta mañá na praza de Galicia da cidade de Ferrolterra.
A presentación deste 37º Rally Cidade de Narón contou coa participación da alcaldesa, Marián Ferreiro, os edís de Deportes e de Seguridade Cidadá, Ibán Santalla e José Oreona; o presidente da Escudería Siroco organizadora da proba, Antonio Sueiras; o coordinador xeral do evento, Moncho Padín; o presidente da Deputación da Coruña, Valentín González e representantes das federacións española e galega de automobilismo, ou cos pilotos Jorge Cagiao, gañador da anterior edición, co Alpine A110 GT+; Javier Bouza, co Ford Escort MKII, Diego Varela, co Hyundai i20N Rallye2 e Máximo Pita co seu Seat Marbella, entre outros.
O coordinador do rally, Moncho Padín, agradeceu o labor da directiva do Siroco Narón polo seu traballo para sacar adiante esta proba e aos máis de 300 voluntarios que colaborarán o venres e o sábado co evento. Así mesmo, Padín destacou o labor de persoal de Seguridade, Policía Local, Garda Civil pola súa
implicación e a patrocinadores e administracións que colaboran co rally.
“O feito de que as federacións galega e estatal se puxesen dacordo no tema das licencias fixo que este ano pasásemos dos 58 inscritos do ano pasado aos 83 deste ano, sendo unha facilidade para os participantes e tamén para a organización” (Moncho Padín, coordinador do 37º Rally de Narón)
Pola súa banda, o responsable de seguridade do Rally de Narón, Ramiro Fandiño, explicou que “volvemos a facelo con cinco tramos a dobre pasada pero cuns cambios do 60% no percorrido, que esperemos que lle gusten aos participantes e asistentes”.
Os cinco tramos que terán que afrontar os pilotos e os seus equipos son os de As Cortiñas, As Enchousas, Santa Cristina, As Barcelas e Sedes, cun total de de 418 quilómetros dos que 119,78 serán cronometrados e que discurrirán polos concellos de Narón, San Sadurniño, Moeche, Cerdido, As Somozas e Valdoviño, que se incorpora este ano, sendo o último do día, o de Sedes, e que podería definir os gañadores desta 37ª edición.
Antonio Troitiño, presidente da Federación Galega asegurou que “para nós é un orgullo ter chegado a un acordo coa Federación Española polo tema das licencias e, sobre todo, que poidan saír beneficiadas as probas do campionato de España, porque para Galicia é moi importante ter probas de primeiro nivel e xa sería o máximo se puidésemos ter un mundial”, incidiu.
A delegada territorial da Xunta, Martina Aneiros, destacou que se trata dun campionato “suficientemente consolidado despois de tantos anos e unha das probas deportivas máis importantes deste concello, da comarca e unha referencia no mundo do automobilismo en Galicia, que está vivindo un momento de auxe”.
Así mesmo, na súa intervención o vicepresidente da Real Federación Española de Automobilismo recoñeceu que “para a institución que representa sempre é un pracer vir a Narón a un rally que foi unha sorpresa hai uns anos cando o descubrimos e que cada día nos sorprende máis”.
Xornada previa ao Rally Cidade de Narón
A rexedora local lembrou que na xornada previa a este 37º Rally Cidade de Narón, coma na pasada edición, haberá un percorrido pola zona urbana, dende o Odeón ata a estrada de Castela, polo que a partir das 20:30 e ata as 21:30 horas o vial permanecerá pechado ao tráfico rodado, co obxectivo de que as persoas que o desexen poidan ver a caravana de vehículos participantes. Tamén o venres, xa pola tarde, terá lugar o shakedown pola parroquia de San Xiao, de 16:00 a 17:30 horas, nun tramo de 2,76 quilómetros nos que equipos e pilotos poderán axustar os seus vehículos.
O sábado, o primeiro participante partirá ás 07:30 horas do parque de asistencias ubicado na rúa Panadeiros, no polígono industrial de Río do Pozo; e sobre as 20:30 horas está prevista a finalización desta edición do Rally de Narón, reuníndose os vehículos no parque pechado do Centro Comercial Odeón, no que ás 20:45 horas se celebrará o pódio e a tradicional cerimonia de entrega de trofeos (21:30 horas.
