O programa do VIII Ames Jazz, que se desenvolverá mañá venres e o sábado, inclúe concertos dos recoñecidos músicos galegos a nivel internacional Álvaro Vieito e Yago Vázquez
O Ames Jazz volve un ano máis ao Pazo da Peregrina coa celebración da súa oitava edición, unha iniciativa organizada pola Concellería de Cultura que se desenvolverá durante a xornadas do venres e o do sábado, 4 e 5 de xullo.
Nesta ocasión, o programa do VIII Ames Jazz inclúe os concertos dos recoñecidos músicos galegos deste característico estilo musical a nivel internacional, Álvaro Vieito, en trío, e Yago Vázquez, tamén en trío. Ademais, o sábado haberá, como principal novidade desta edición, unha sesión vermú, no local O Transistor, a cargo de Gloria Pavía e Rafa Morales, e o faladoiro A situación do Jazz e da música galega, con entrada libre e de balde.
O alcalde de Ames e concelleiro de Cultura, Blas García, destacou durante a presentación que “Ames vai seguir apostando polo Jazz. A cultura é moi ampla, diversa e variada, polo que temos que dar a oportunidade á veciñanza do concello, e aos da contorna, de poder escoller e ofrecer alternativas para chegar a todos os públicos”.
Con Ames Jazz pretendemos dar un paso máis e desestacionalizar este estilo musical ofrecendo propostas en diferentes épocas do ano e, sobre todo, poder saír aos colexios e achegarlle á mocidade este xénero musical” (Blas García, alcalde e concelleiro de Cultura de Ames)
O festival VIII Ames Jazz comeza, mañá venres 4 de xullo ás 22:00 horas, co concerto de Álvaro Vieito Trío, guitarrista galego afincado en Sevilla dende hai moitos anos e que, a día de hoxe, é todo un referente no mundo do Jazz dentro e fóra da nosa comunidade. O artista está a presentar o seu novo proxecto en formato trío, no que o público poderá gozar dunha experiencia íntima.
