O Concello de Santiago recibiu un burofax da familia Franco no que expresa a súa vontade de cumprir coa sentenza que a obriga a devolver as estatuas dos profetas do Pórtico da Gloria atribuídas ao Mestre Mateo
A alcaldesa do Concello de Santiago, Goretti Sanmartín, compareceu ante os medios de comunicación para informar de que recibiu un burofax do avogado da familia Franco no que recolle a vontade expresa de cumprir a sentenza que a obriga a devolver as estatuas dos profetas do Pórtico da Gloria atribuídas ao Mestre Mateo.
A rexedora compostelá deu instrucións internas para iniciar os trámites co fin de traer de volta as dúas figuras o máis axiña posible e indicou que o Concello de Santiago se porá en contacto coa Administración do Estado e a Dirección Xeral de Patrimonio.
Na carta remitida este mércores, os herdeiros de Franco manifestan que “asumen a sentenza e están en disposición de entregar as estatuas de maneira inmediata”, cumprindo co dictado xudicial “de maneira voluntaria e total”.
“É un día grande para esta casa, para o Concello de Santiago e para a sociedade civil, porque empezamos a contra atrás para materializar a volta dos profetas do Pórtico ao Concello. Os herdeiros de Franco claudican na súa batalla por seguir sendo os donos dunhas estatuas que evidentemente non lles pertencen” (Goretti Sanmartín, alcaldesa de Santiago)
Goretti Sanmartín explicou tamén que xa deu instrucións internas para iniciar as accións que se deben adoptar, a comezar por analizar cal é procedemento e para “buscar a maneira más rápida de traer as estatuas” de novo para Compostela.
En canto á localización, a rexedora confirmou que se traballará da man das persoas expertas para buscar o mellor sitio, que reúna as condicións técnicas de conservación e tamén poidan estar expostas ao público permanentemente. Ademais, a alcaldesa indicou que ligada á devolución das estatuas, deberá haber unha explicación que fique para as xeracións vindeiras e actuais.
Goretti Sanmartín recoñeceu o traballo de todos os colectivos de loita pola memoria histórica e singularmente á asociación O Sorriso de Daniel. Tamén fixo extensivos os recoñecementos aos agradecementos a persoas, entidades e institucións, os alcaldes Martiño Noriega e Xosé Sánchez Bugallo, ao persoal da Asesoría Xurídica e de Patrimonio do Concello e a todos os colectivos que levan anos “deixándose a pel para facer realidade que o que foi espoliado e roubado volva a onde non debeu saír”.
En definitiva, Goretti Sanmartín remarcou que onte deron os primeiros pasos para que, da maneira máis rápida posible, traer os profetas para o concello, e iniciamos o procedemento de consulta e asesoramento de escoita para decidir os requisitos de conservación técnica e de exposición pública.
