O Lil Team, da academia Paso a Paso, conseguiu o ouro na categoría ‘Júnior Large’ neste I Mundial de Hip Hop que acolleu en Narón a máis de 800 deportistas de ata 8 países
A agrupación Lil Team, da academia de baile Paso a Paso de Narón, alzáronse a pasada fin de semana co primeiro premio da primeira edición do Mundial de Hip Hop coreográfico que se disputou no Pazo da Cultura da cidade de Ferrolterra.
A alcaldesa de Narón, Marián Ferreiro, felicitou aos gañadores ao remate da cita mundial, cos que conversou sobre esta experiencia, que suma un novo éxito para a citada agrupación de baile. O Concello e o Club Baile Deportivo Narón organizan este I Mundial de Hip Hop coreográfico, no que participaron máis de 800 deportistas procedentes de ata oito países.
A Liga Xunta de Galicia de Hip Hop, abriu o sábado pola mañá a fin de se semana do Mundial de Hip Hop. Ao remate da competición autonómica, deu comezo a cerimonia inaugural do primeiro WDSF Campionato do Mundo de Hip Hop, co traslado da bandeira ao escenario do Pazo da Cultura e a chegada dos participantes, que deu paso ao inicio das competición nas distintas categorías.
A última hora da tarde do sábado foi a quenda da disputa das finais nas categorías Junior Small, Adult Mega e Junior Large e finalmente procedeuse á entrega de premios, na que participaron, entre outros, a alcaldesa de Narón, Marián Ferreiro; o secretario xeral da WDSF, Sergey Nifontov; e o presidente da FEBD, Luis Vañó.
Estamos ante un Mundial de Hip Hop que é posible grazas aos clubs que participades, deportistas e técnicos e, como non, a todas esas persoas que entre o público estades apoiando e animando aos rapaces e rapazas. É un honor e un feito que formará sempre parte da nosa historia que o primeiro campionato mundial de hip hop coreográfico se desenvolvese na nos acidade” (Marián Ferreiro, alcaldesa de Narón)
Na categoría Junior Large, os naroneses Lil Team alzáronse co primeiro premio, se ben o segundo foi para Jungle, de Francia, e o terceiro para os tamén españois Get Down. Na categoría de Adult Mega, os campións foron Da Family, a prata e o bronce foron para Havana Nights e Humans in Motion, as tres agrupación representando a España. Na categoría Junior Small os campións foron os tamén nacionais Beat It, superando aos Red Hats de Chipre, segundos, e a Magic Feet, tamén españois.
As federacións mundial e estatal agradeceron a implicación do Concello de Narón e o CBD Narón con este evento deportivo, valorando o feito de que se levase a cabo na cidade, cunha ampla traxectoria no eido do baile deportivo. Pola súa banda, a rexedora local agradeceu a confianza das federacións mundial, estatal e autonómica para elixir Narón como sede deste I Mundial de Hip Hop e tamén o labor dos xuíces asistentes e do CBD Narón.
